يوميات زوجه رجل ممل, يوووووووووووه علي الملل

من اجمل القصص التي قراتها علي النت عشان كدة قررت اني اجبهالكو

بس طبعا عايزين تشجيع

يالة نبتدي

الحلقة الاولي

مر على زواجنا شهرين وكانوا يا سلاااااام أسعد شهرين في حياتي، وقلت لنفسي الناس فعلا بتهول لما بتقول أن الجواز شهر واحد عسل والباقي بصل، وأطمأن قلبي أن حياتي كلها هتكون عسل في عسل...

ومرت الأيام وبدأ زوجي "هاني" في انشغاله بعمله وبدأت أشعر بملل رهيب، طبعا بعد أن أصر زوجي الكريم أن أترك عملي بعد الزواج، بالإضافة أني كنت اجتماعية جدا، ولكن قلت لنفسي مادام طيب وابن حلال كله يهون، وحاولت أشغل وقت فراغي وطبعا لما يرجع من شغله يلاقي ما لذ وطاب على السفرة، زي ما أهلي علموني "أسهل طريق لقلب الراجل معدته".

وبعد ما يرجع هاني من الشغل، نأكل سوا ونقعد نتكلم شوية..نتفرج على التليفزيون وبعدين ننام، وهكذا كل يوم..روتين فظيع ما فيش أي نوع من التغيير...

وكنت أنتظر يوم الجمعة بفارغ الصبر، أخيرا هنتفسح..ولكن طلع يوم الجمعة يوم العائلة المقدس لازم تتجمع فيه عائلة زوجي الكريم...

وفي يوم من أيام الجمعة قررت أخرج من صمتي وأكلمه بصراحة..نفسي أخرررررررررج.

- صباح الخير يا هاني.
- صباح النور يا حبيبتي.
- إيه رأيك نخرج شوية النهاردة.
- طيب ما إحنا فعلا خارجين انت نسيتي النهاردة رايحيين لماما.
- أنا مش ناسية بس أنا نفسي نغير شوية إيه رأيك نخرج نقعد في أي حتة.

فجأة قلب هاني وشه وقال لي:
- أنت مش عايزاني أروح لأهلي خالص أنا ما كنتش فاكرك كدة، عيب عليكي دا اليوم الوحيد اللي بشوفهم فيه طول الأسبوع.
- يا حبيبي بالراحة أنا مش عايزة أفرق بينك وبينهم ولا حاجة بس أنا نفسي أغير جو، وممكن نروح لأهلك في أي يوم.
- بقولك إيه إنسي.. يلا ألبسي عشان نروح لماما.

وذهبنا لحماتي العزيزة وطبعا تأثير الخناقة باين عليا ما أنا نفسي أخرج أعمل إيه بس؟!
وبعد 3 ساعات حسيت أن هاني حس أخيرا بيا، وقال نروح بدري شوية..ولكن هيهات أنا كنت بحلم.
- نهي تعالي أنا عايزك.
- خير يا هاني.
- الأسلوب دا مش هينفع معايا أنت فاكرة عشان ما خرجتيش تروحي لماما مكشرة وما تتكلميش معاهم.
- بس أنا كنت بتكلم عادي.
- لأ دي ماما قالت لي أنك كمان ما كلتيش كويس.
- لا حول ولا قوة إل بالله يعني أصريت أني أروح ورحت، كمان هتتحكم أنا كلت ولا لأ، مش كفاية أننا لم نخرج، تصبح على خير.
- نهي استني أنا لسه بكلمك.
- هاني تصبح على خير.

كان نفسي فعلا نصبح على خير..لكن اللي حصل الصبح مكانش خير خاااالص..

* انتظروا ما حدث بين هاني ونهي في الحلقة التالية

» يوميات شاب روش طحن
» من يوميات الحب والحلم
» ماذا تحب ان تكون مواصفات زوجه المستقبل؟؟؟ لشباب والبنات